• Es òbres deth nau blòc obstetric dejà son finalizades e eth nau equipament ei lèu prèst, ua hita fòrça important perque, per un costat, permeterà ara Val d’Aran compdar damb ua sala de dilatacion e ua sala de parts de darrèra generacion, e d’un aute costat, perque era remodelacion der airau quirurgic, requerís qu’era sala de parts sigue condicionada damb totes es garanties entà èster emplegada coma quiròfan
• Quan es òbres deth nau airau quirurgic finalizen, er Espitau Val d’Aran compdarà damb un blòc obstetric tanben abilitat coma quiròfan, dus quiròfans de plen rendiment e un espaci de Cirurgia Major Ambulatòria, dotadi damb es darrères tecnologies.

Era sindica d’Aran, Maria Vergés, acompanhada pera directora deth Servici Aranés de Benèster e Salut (SABS), Maria Àngels Borràs, eth director-gerent d’Aran Salut, Jordi Vilana, era directora d’Infirmeria der Espitau Val d’Aran, Pilar Cos, e er equip tecnic deth Conselh Generau d’Aran, an visitat aué es òbres deth nau blòc obstetric der Espitau, damb ua sala de parts que compde tanben damb es requeriments de besonh entà èster emplegada coma quiròfan.

“Dempús de totes es dificultats qu’a auut de trauessar aguest projècte, coma era arribada dera pandèmia o era complexitat tecnica que hec qu’era licitacion demorèsse desèrta en quauqua ocasion, dejà mos trapam ena fasa finau e èm a punt d’auer prèst, ara fin, eth nau blòc obstetric der Espitau Val d’Aran” afirmaue era sindica d’Aran, en tot híger que: “aguesta hita ei fòrça important perque permeterà compdar damb ua sala de dilatacion e ua sala de parts de darrèra generacion que sigue abilitada tanben coma quiròfan”.

Era sala de parts d’aguest nau blòc obstetric a estat bastida entà compdar damb es requeriments tecnics de besonh e era tecnologia d’un quiròfan intelligent.

“Enes pròplèu setmanes aguesta sala començarà a foncionar coma quiròfan, en tot convíuer pendent un parelh de setmanes damb er airau quirorgic actuau enquia començar es òbres deth nau airau quirorgic, que mos permeterà compdar damb dus quiròfans de darrèra generacion”, asseguraue Vergés, en tot híger, en aguest sens que: “deth govèrn deth Conselh Generau d’Aran ençà volem arregraïr as professionaus d’Aran Salut era sua paciéncia en tot aguest procès e eth trabalh qu’amien a tèrme entà garantir era melhor des atencions ara ciutadania aranesa”.

Amassa damb es òbres deth blòc obstetric, s’a creat tanben un espaci de Cirurgia Major Ambulatòria (CMA), entà facilitar era atencion de pacients qu’an de passar per petites cirurgies, pròves o exploracions que non requerissen d’ingrès mès òc d’un temps d’observacion.

En finalizar es òbres dera naua zòna quirorgica, qu’ei previst que s’alonguen pendent uns tres mesi, er Espitau Val d’Aran compdarà damb un blòc obstetric damb sala de dilatacion e sala de parts tanben abilitada coma quiròfan, dus quiròfans de plen rendiment e un espaci de CMA, dotadi damb es darrères tecnologies e pensadi entà garantir era asssisténcia en quinsevolh des circunsutancies laguens des possibilitats deth sistèma.

Vielha, 13 de març de 2023