• A compdar d’aguest mes de mai, s’amplie era cartèra de servici e infermeria realizarà retinografies en gabinet d’exploracions, ues pròbes de fòrça importància entara deteccion precòç de malauties oculares qu’en sòn inici son asimptomatiques e que, detectades a temps, an un pronostic fòrça mès favorable

Enes Servicis Assistenciaus Integrats d’Aran se començaràn a hèr retinografies pendent aguest mes, en tot somar un nau servici de diagnostic de fòrça importància entara deteccion precòç de malauties oculares qu’en sòn inici son asimptomatiques e que detectades a temps, an un pronostic fòrça mès favorable.

Aguesta pròva serà realizada per infermeria en gabinet d’exploracions, e de moment, a demana des mètges/ses. Mès pròximament, tanben s’amiarà a tèrme aguesta pròva en tot hèr cribatge de patologies oculares a pacients diabetics. Ath delà, eth retinograf, qu’ei er aparelh que realize es retinografies, ei ua airina mès que poiràn utilizar es oftalmològs enes consultes extèrnes.

Era retinografia ei ua pròva diagnostica simpla, non invasiva, indolora e fòrça util que non compòrte cap risc entath pacient. Aguesta, se realize damb un retinograf, qu’ei dotat d’ua camera de nauta definicion qu’obten imatges fotografiques a color: deth hons deth uelh, era retina, era màcula e es vasos sanguinis.

Aguesta maquina, ei connectada a un ordenador e es fotografies passen dirèctaments ara istòria clinica deth pacient, çò que mos permeterà hèr estudis comparatius entre imatges hètes en diferenti moments, en tot hèr eth seguiment evolutiu des malauties oculares.

Era retinografia ei fòrça indicada entà:
• Persones diabetiques (cribratge de complicacions oculares coma glaucoma e retinopatia)
• Persones hipertenses
• Persones damb miopia
• Persones damb antecedents familhaus de patologia ocular
• Persones mès granes de 50 ans

Era implementacion d’aguesta naua pròva supause era ampliacion dera cartèra de servicis entà aufrir mès pròves diagnostiques enfocades a accions sanitàries preventives, damb er objectiu de poder detectar lèu es malauties oculares e hèr-ne un seguiment mès precís.

Vielha, 21 de mai de 2023