• Pendent aguesta prumèra fasa s’atierà ath torn de 12 persones despartides per tota era Val d’Aran que dejà an estan derivades a trauès d’Aran Salut.
Eth Conselh Generau d’Aran met en foncionament aué, 1 d’abriu, eth sòn Servici d’Atencion en entorn Domiciliari (SAeD), un servici que prestarà atencion non sonque ara gent grana, senon a persones damb discapacitat, gent damb besonhs puntuaus, familhes monoparentaus o enfants en risc, entre d’auti, qu’agen de besonh aguest tipe de d’atencion en sòn domicili, damb er objectiu de contribuïr ara melhora dera sua salut e benèster entà evitar espitalizacions e institucionalizacions que non siguen de besonh.
“Er objectiu principau deth govèrn deth Conselh Generau d’Aran ei plaçar en centre des nòstes politiques as persones e aué, damb era metuda en foncionament d’aguest SAeD, viuem un dia istoric entath nòste territòri”, afirmaue era sindica d’Aran, Maria Vergés, en tot híger que “cau destacar qu’aguest servici ei universau e gratuït, mèrque un abans e un dempús ena atencion as persones ena Val d’Aran e permetarà hèr un gran pas entà consolidar era transversalitat dera gestion sanitària e sociau en Aran”.
Enquiara, era Val d’Aran ère er unic territòri de Catalunya sense aguest tipe de servici as persones, per tant, damb era sua implementacion s’artenh un auanç plan important entà totes es persones (en quinsevolh etapa dera sua vida) qu’agen de besonh aguest tipe de d’atencion en sòn domicili. Eth Conselh Generau d’Aran inicie aguest servici en tot dotar-lo d’ua partida de 280.000€ ar an, qu’aurà d’èster finançada, en part, pera Generalitat de Catalunya.
Eth procès d’accés ath SAeD s’iniciarà damb era deteccion deth besonh per part deth personau sociau o sanitari d’Aran Salut o ben per demana dirècta dera persona usatgèra, familha o representant legau. Era demana d’accès ath Servici passarà per ua comission avaloradora multidisciplinària, formada per professionaus sanitaris e sociaus, que serà era responsabla de decidir, segontes es critèris establidi, s’era sollicitud corresponenta ei aprobada. Peth moment, aguest projècte s’inicie damb 12 persones usatgères detectades a trauès d’Aran Salut, 3 trabalhadores familhars e ua coordinadora deth servici.
Es accions que s’amiaràn a tèrme se classifiquen en dues tipologies de servici: es servicis d’atencion personau, a on era persona usatgèra recep supòrt entà realizar activitats relacionades damb eth suenh personau (igièna, vestir-se e desvestir-se, acompanhament en activitats basiques dera vida diària, gessudes, etc) e servicis d’atencion ath domicili
Vielha, 1 abriu de 2022
