• Atau madeish, tanben s’autrejarà eth Prèmi 17 de Junh as centres educatius dera Val d’Aran e es sòns professionaus, coma mòstra d’arregraïment ath sòn trabalh coma un des èishi vertebradors dera societat aranesa, atau coma reconeishement ar esfòrç e trabalh des sòns professionaus entà afrontar es ans dera pandèmia

Aguest diuendres aurà lòc, ena Casa deth Senhor d’Arròs, un Plen Extraordinari deth Conselh Generau d’Aran en quau se presentaràn es prepauses entà autrejar es Prèmis 17 de Junh as centres educatius aranesi e era Medalha d’Aunor dera maxima institucion aranesa ara doctora Immaculada Caubet.

“Deth govèrn deth Conselh Generau d’Aran ençà volem autrejar ara doctora Immaculada Caubet Busquet aguesta distincion coma mòstra de reconeishement a  toti es ans de carrèra coma pediatra en Espitau dera Val d’Aran, en tot demorar ath servici dera ciutadania d’Aran damb compromís e vocacion de servici” afirmaue era sindica d’Aran, Maria Vergés, en tot híger: “pendent es sòns 40 ans coma pediatra en nòste territòri, era sua fèrma volontat de hèr auançar e consolidar eth sistèma sanitari aranés a demorat manifestada a trauès dera sua leiautat a Aran e ara sua gent, sustot as mès petititi que, damb era sua implicacion mès enlà des pròpries obligacions professionaus, tostemp a suenhat e protegit. Generacions d’aranesi e araneses an auut ena doctora Caubet non sonque ara sua pediatra, senon un referent uman e professionau”.

Era Medalha d’Aunor deth Conselh Generau d’Aran ei era màger condecoracion qu’era maxima institucion aranesa pòt autrejar, e a per objècte reconéisher e distinguir ad aqueres persones o entitats, autant dera Val d’Aran coma de d’auti endrets, qu’agen destacat pes sòns servicis ara Val d’Aran o pes sòns meritaments extraordinaris. Era autreja d’aguesta Medalha ara doctora Caubet aurà lòc eth diuendres, 17 de junh, entàs 12:00 ores enes roïnes deth Santuari de Mijaran, pendent er acte institucionau de commemoracion dera Hèsta d’Aran.

D’un aute costat, eth Conselh Generau d’Aran vò reconéisher eth trabalh qu’era Escòla Aranesa a amiat a tèrme pendent es sòns 38 ans d’istòria e, fòrça especiaument, pendent es ans d’emergéncia sanitària que venguem de patir, e ac harà damb er autrejament deth Prèmi 17 de Junh as centres educatius de tot eth territòri.

“Ath long dera sua istòria, era Escòla Aranesa a estat un des èishi vertebradors dera nòsta societat, en tot èster clau tara normalizacion dera nòsta lengua pròpria e tà consolidar un modèl educatiu pròpri que, damb eth temps, s’a demostrat coma un modèl d’exit” explicaue era sindica, que higie: “ath delà, pendent es dus darrèri ans, damb era pandèmia, es centres educatius e es sòns professionaus an auut d’afrontar ua situacion naua e complèxa que les a obligat a reinventar-se, eth barrament des escòles les forcèc a passar der ensenhament presenciau ara educacion a distància en qüestion de dies, damb eth sofreesfòrç qu’aquerò supausèc. Era pandèmia a metut de relhèu eth papèr trascendentau qu’exercís era escòla e es sòns professionaus ena societat e, en cas dera Val d’Aran, non a estat ua excepcion”.

Es Prèmis 17 de Junh an era finalitat de reconéisher e arregraïr annauments as persones, collectius o entitats que, pr’amor des sòns merits, an destacat pes servicis prestadi ara Val d’Aran enes diuèrsi encastres dera vida sociau, culturau, esportiva o economica, en tot dignificar es sòns pròpris encastres e aunorar ath país.

Er acte d’autrejament des Prèmis 17 de Junh aurà lòc dijaus que ven, dia 16, ara seguida des Prèmis Aran de Literatura e Mossèn Condò, a compdar des 19:00 ores ena Glèisa de Mijaran.

Vielha, 7 de junh de 2022