• Ua fisioterapèuta, ua dietista-nutricionista e ua psicològa referenta en benèster emocionau son es naues incorporacions d’enguan laguens deth Plan de Refortiment dera Atencion Primària e Comunitària entà balhar estratègies saludables tara poblacion e promòir era salut preventiva.

Aguesti tres naui perfius professionaus s’an hijut as dera equipa d’Atencion Primària e Comunitària entà promòir era salut comunitària coma ua prioritat entara prevencion e era promocion dera salut. Damb er objectiu principau d’aufrir estratègies de salut tara ciutadanetat e redusir era nauta prevalença dera medicacion.

Era psicològa referenta en Benèster Emocionau, Sònia Faure, a iniciat diuèrsi grops psicoeducatius de gestion emocionau entà adults e professionaus sanitaris. E ja premanís entad aguest an 2023, grops de joenessa e persones cuedadores.

Per çò que tanh ara dietista-nutricionista, Esther Carmona, a desvolopat sessions sus alimentacion saludabla pendent er embaràs e er aleitament maternau laguens deth programa de Preparacion tara Maternitat e sus alimentacion e benèster emocionau laguens deth grop psicoeducatiu. Eth sòn següent projècte serà milhorar es abituds alimentàries des familhes damb mainadèra e adolescents.

Tanben, era fisioterapèuta Mireia Giné a coma objectiu promòir e aumentar era autonomia, er estat foncionau e previer er estat de fragilitat des persones que patissen problèmes de salut cronics de baisha complexitat e nauta prevalença.

Laguens dera equipa de Salut Comunitària, dera quau formen part aguesti naui ròtles, ja compdam damb era importanta mission des professionaus de Trabalh Sociau, d’Infirmeria e de Medecina Familiau e Comunitària. Trabalhant amassa de manèra coordinada, se vò crear ua equipa damb un ròtle actiu enes dinamiques salutogeniques dera poblacion, en tot includir a persones interessades en aguest encastre que volguen formar part dera comission e dar votz ara comunitat.

Vielha, 19 de gèr de 2023