• Dues psicològues, ua educadora sociau e ua trabalhadora sociau son es ròtles recentment hijudi en servicis sociaus

Er airau de servicis sociaus d’Aran Salut s’amplie damb quate professionaus mès entà curbir es besonhs deth territòri e aufrir naui servicis d’atencion sociau ena Val d’Aran.

Atenent ath nòste modèl unic integrau d’atencion sanitària e sociau, aguesti naui perfius s’an anat incorporant coma ua part fonamentau entà poder desvolopar eth projècte d’Atencion Centrada ena Persona qu’a coma objectius balhar ua respòsta sanitària e sociau unica deuant des besonhs coma era melhora dera autonomia e qualitat de vida dera ciutadania.

Sandra Castet ei a compdar d’ara era psicològa deth Centre de Descolopament Infantil e Atencion Precòç (CDIAP) plaçat en carrèr Pomaròla de Vielha, e tanben amassa damb era educadora sociau, Seila Grau, s’encuedaràn d’atier as enfants, adolescents e as sues familhes a trauès deth Servici d’Intervencion Socioeducativa.

Per çò que tanh ath Servici pes Drets des Hemnes e es persones LGTBIQ+, Carla Gavaldà ei era psicològa a cargue d’aguest nau servici en Aran, que s’a explicat ara poblacion pendent es darrères setmanes en presentacions en diuèrsi endrets deth territòri (Les, Bossòst, Vielha e Salardú).

Tanben, entà refortilhar era equipa existenta de servicis sociaus enes naui prètzhèts qu’implique eth desvolopament deth nau modèl d’atencion, s’a incorporat era trabalhadora sociau, Judith Moles.

Damb aquesta ampliacion dera equipa, autan coma damb era creacion des naui servici aufridi, era institucion cerque bastir es bases de besonh entà qu’Aran pogue suenhar de totes es persones sanitària e sociaument e non deishar ad arrès ath darrèr.