• Eth Conselh Generau d’Aran amplie a compdar d’aguest mes de junhsèga era cartèra de Servicis Assistenciaus Integrats gràcies ara sua aliança damb eth Hospital del Mar, en tot compdar en Espitau Val d’Aran damb un nau endocrin e ua educadora de diabèti que visitaràn presenciaument ena Val d’Aran cada mes e, setmanaument, realizaràn valoracions telematiques de derivacions, balharàn resultats e haràn seguiment as pacients

Aguest mes de junhsèga s’inície era collaboracion entre es Servicis Assistenciaus Integrats d’Aran damb eth servici d’endocrin deth Hospital del Mar de Barcelona, en tot poder compdar atau damb era preséncia en Espitau Val d’Aran d’un endocrin e ua educadora de diabèti cada mes, qu’ath delà realizaràn setmanaument valoracions telematiques de derivacions, daràn resultats e haràn seguiment as pacients.

“Gràcies ad aguesta aliança damb eth Hospital del Mar, ampliam era cartèra de servicis de salut deth Conselh Generau d’Aran e continuam trabalhant entà melhorar era atencion assistenciau as usatgèrs e usatgères deth nòste sistèma, evitaant atau eth maxim de desplaçaments possibles dehòra dera Val d’Aran”, afirmaue era sindica d’Aran, Maria Vergés.

Tanben, a trauès d’aguest acòrd, es professionaus d’Aran compdaràn damb eth supòrt des especialistes deth Hospital del Mar en çò que tanh ara revision des casi, as sessions cliniques, formacion, etc.

Aguesta naua cartèra d’endocrin se centrarà en: diabèti gestacionau, trastorns tiroïdians pendent er embaràs, diabèti des adults que non poguen gerir-se des d’Atencion Primària, patologia tiroïdiana o paratiroïdiana, determinats tipes d’obesitat e quinsevolh aute problèma endocrinologic que d’Atencion Primària o medecina intèrna se considère susceptible de derivacion ad aguesta especialitat.

Era preséncia d’aguesti especialistes endocrins en Aran, autant de manèra presenciau coma telematica, permeterà ara ciutadanetat auer accès ad aguesta especialitat en territòri, e tanben, facilitarà as professionaus des Servicis Assistenciaus Integrats d’Aran eth supòrt e era capacitat d’ampliacion de coneishement en aguest airau e eth trabalh en equipa a distància.

Vielha, 4 de junhsèga de 2023