• Eth passat dimèrcles dia 6 de seteme, part dera equipa dera Unitat d’Atencion as usatgèrs (UAU) der Espitau Val d’Aran s’amassèren damb professionaus deth Consorci Sanitari de Terrassa que les presentèren eth projècte de “hièstra unica” e eth modèl integrat de gestion de pacients e atencion ara ciutadania

Aguest grop de membres dera UAU lo conformèren: Mª Àngels Borràs, directora deth Servici Aranès de Benèster e Salut, Joaquim Pastor, cap assistenciau dera UAU, Sandy Piera, cap tecnica dera UAU e Patricia Vergés, oficiau administrativa dera UAU. Toti eri se desplaçèren ar Espitau CST de Terrassa entà poder conéisher de prumèra man eth modèl d’atencion de “hièstra unica”.

Aguest projècte qu’unifique era atencion ambulatòria damb era coordinacion d’atencion primària e espitalària en ua unica hièstra, siguec presentat per Núria Pagès, directora de GPAC, David Mèrida, director deth CAP Sant Genís de Rubí e Antonio Sánchez, cap deth servici de cardiologia. Aguest nau modèl facilite era coordinacion e comunicacion entre es diuèrsi nivèus assistenciaus en tot evitar desplaçaments e visites que non apòrten valor as usatgèrs/es, ne as professionaus.

Tanben, era directora de Gestion deth GPAC dèc a conéisher eth modèl integrat de Gestion de pacients e atencion ara ciutadania, explicant era integracion deth personau de GPAC en toti es airaus d’atencion.

Eth Consorci Sanitari de Terrassa ei ua organizacion sanitària integrada que dispòse de toti es nivèus d’atencion (primària, especializada, sociosanitària e de salut mentau) de manèra contunhada e coordinada aufrís servicis de salut ara poblacion Vallès Occidental, es municipis de Terrassa, Matadepera, Rubí, Castellbisbal, Sabadell e Sant Quirze.

Vielha, 13 de seteme de 2023.