• En gèr deth 2023, se formèren quate grops damb professionaus der encastre sanitari e sociau entorn a quate linhes estrategiques entà desvolopar melhores ena Atencion primaria sociau e sanitària de l’Aran.

Eth passat dia 1 de deseme, se presentèc eth trabalh realizat pendent tot er an 2023 des grops de trabalh que desvolòpen es sòns projèctes en relacion as quate linhes estrategiques restacades damb l’atencion primària sociau e sanitària.

Aguesti grops multidisciplinaris son formadi per professionaus medicaus, d’infermeria, trabalh sociau, educacion sociau, psicologia, nutricion, fisioterapia e administracion que formen part d’Aran Salut; aguesti professionaus an trabalhat amassa enguan jos era supervision e lideratge de CAPSBE (Consorci d’Atenció Primària de Salut de l’Eixample).

De gèr deth 2023 ençà, aguesti quate grops s’an amassat periodicaments entà méter en comun e estudiar de forma conjunta sus quate linhes estrategiques dera Atencion Primària Sociau e Sanitària deth territòri: era atencion comunitària, era atencion centrada ena persona, hèr a conéisher es naui perfils professionaus que trabalhen a Atencion Primària e eth Suenh as professionaus.

En aguesta presentacion, es quate grops compartiren es resultats des prètzhèts desvolopadi qu’an artenhut pendent tot er an e exposèren quini seràn es objectius e projèctes prioritaris de cara ath 2024.

A trauès d’aguesti projèctes, se compartís informacion entre es professionaus des diferenti encastres des Servicis Assistenciaus Integrats d’Aran e  trabalhen de forma conjunta entà obtier solucions mès eficientes e resolutives entà melhorar dera qualitat de vida des persones e es sues familhes.

Aguesta metodologia arrespon ara intencion impulsada deth Conselh Generau d’Aran  d’èster un modèl pionèr d’integracion de servicis entà aufrir ua atencion mès centrada enes besonhs des persones, atau coma de trobar estruments entre es diferenti airaus d’atencion entà facilitar era sua autonomia e benestar.

Vielha, 20 de deseme de 2023