• Aguest recors, que se desvolòpe a trauès des professionaus especializadi des Servicis Assistenciaus Integrats d’Aran de forma anonima e confidenciau, ei un esturment especializat e preventiu que balhe assessorament e informacion as familhes sus tèmes fòrça diuèrsi que poguen èster deth sòn interès coma salut mentau, educacion sexuau, nutricion e igièna bucau o educacion des hilhs e hilhes enes diferentes estapes, entre d’auti
• Aguest nau servici comence eth pròplèu dimars, 16 de gèr entàs 16h, damb eth servici “Konsulta’m” sus suenh e gestion emocionau e dimèrcles, 17 de gèr entàs 17:30h, damb eth talhèr “XXX -Pirience sus era incomoditat de parlar de pòrno”, que s’amiaràn a tèrme en carrèr Pomarola 12 de Vielha

Eth govèrn d’Aran, a trauès des sòns Servicis Assistenciaus Integrats, a impulsat un nau espaci comunitari d’atencion especializada e aprenedissatge collectiu. Un recors interdisciplinari, especializat e preventiu qu’aufrís orientacion, atencion, informacion e assessorament as familhes sus diferents aspèctes que poguen èster d’interès enes diuèrses etapes des sues vides.

“Deth Conselh Generau d’Aran ençà èm plan satisfèts de poder amiar endeuant aguesta iniciativa que servirà entà qu’es familhes dera Val d’Aran compartisquen es sòns dubtes damb es nòsti professionaus especializadi des Servicis Assistenciaus Integrats, que les poiràn balhar responses e informacion en airaus coma era educacion sexuau, era nutricion, er emplec de pantalhes, era igualtat, es adiccions o era salut mentau, entre fòrça d’auti”, explicaue era sindica d’Aran, Maria Vergés.

Eth servici, qu’ei anonim e confidenciau, s’estructure en diuèrsi espacis:

• “Konsulta’m”: espaci d’atencion individuau damb consultes planificades cada trimèstre sus diuèrsi tèmes coma salut mentau e emocionau, educacion e foncions parentaus, nutricion e igièna bucau, educacion sexuau e afectiva, fisioteràpia e exercici fisic, educacion des hilhs e hilhes enes diferentes estapes. Es consultes poiràn variar d’un trimèstre entar aute en foncion des demanes des familhes.
• Espaci de talhèrs e charrades, a on se planifiquen dinamiques participatives dubèrtes relacionades damb es tèmes tractadi en Konsulta’m.
• Damb un hilat de Comunitat Cuedadora se collabòre damb er hilat sociau, en tot fomentar era participacion des familhes en activitats comunitàries.

Aguest nau servici s’amiarà a tèrme toti dimars e dimèrcles en carrèr Pomarola 12, de Vielha. Er orari de consulta dubèrta serà de 16h a 19h e er orari des talhèrs de 17:30h a 19h.

Er espaci “En Familha” començarà eth pròplèu dimars, 16 de gèr, damb eth servici “Konsulta’m” sus suenh e gestion emocionau, dera man dera psicològa de benestar emocionau, e dimèrcles, 17 de gèr damb eth talhèr “XXX -Perience sus era incomoditat de parlar de pòrno” damb era tecnica d’igualtat e era psicològa de mauestars de genre.