• Era sindica d’Aran, Maria Vergés, a recebut aué ath conselhèr de Salut dera Generalitat, Manel Balcells, damb qui an signat er acòrd peth quau era Generalitat se compromet a finançar integraments era ampliacion e remodelacion der Espitau Val d’Aran ·

• Er Espitau Val d’Aran a complit dejà 38 ans e aguest acòrd supause ua hita istorica entara Val d’Aran que permeterà amiar a tèrme ua melhora plan importanta, per prumèr còp en decades, en tot renauir e ampliar airaus atau coma melhorar eth comfòrt autant des usatgèrs coma des professionaus

Era sindica d’Aran, Maria Vergés, a recebut aguest maitin ena sedença deth Conselh Generau d’Aran ath conselhèr de Salut dera Generalitat, Manel Balcells, damb qui an signat er acòrd entre eth Departament de Salut e eth govèrn d’Aran peth quau era Generalitat se compromet ath finançament des òbres d’ampliacion e remodelacion der Espitau Val d’Aran.

Er acòrd prevé era execucion des òbres entre 2023 e 2028, en tot èster dividides, en prumèra instància, en tres fases: ua fase iniciau d’adequacion dera plaça entre er Espitau e era residéncia Sant Antòni, que començarie aguest madeish an, ua prumèra fasa de bastiment d’un nau edifici ath cant dera residéncia a on se plaçarien es consultes d’atencion primària e especializada e ua darrèra fasa entà remodelar es espacis d’urgéncies e diagnostic pera imatge.

“Er Espitau Val d’Aran, tot e auer envielhit fòrça ben, a dejà lèu quaranta ans e era sua remodelacion ei ja quauquarren essenciau tà atier es besonhs qu’a era Val d’Aran” afirmaue era sindica d’Aran e higie que “amassa damb es òbres que s’an de realizar entà acuélher er airau d’atencion sociau e benèster ath cant madeish der Espitau mos permeteran centralizar toti es servicis d’atencion as persones en un madeish endret”.

Ei de besonh rebrembar qu’eth modèl sanitari e sociau integrat d’Aran Salut prèste ua atencion centrada enes persones e qu’amasse actuacions d’atencion primària, espitalària, especializada, socionaritària e dera salut mentau e inclodís tanben ua prestacion de servicis sociaus. Un modèl pròpri e transversau que s’a demostrat eficaç ara ora d’atier es besonhs dera nòsta ciutadania e qu’eth govèrn d’Aran trabalhe entà consolidar, en tot desvolopar projèctes pionèrs d’integracion

sociau e sanitària, que poguen èster adaptables e extrapolables a d’auti territòris. En aguest sens, cau rebrembar qu’Aran a artenhut finaçament europèu entà consolidar eth sòn modèu d’Atencion Centrada ena Persona.

“Deth govèrn d’Aran ençà, a despièch de vier de trauessar era pitjor crisi sanitària dera nòsta istòria recenta, auem artenhut auanci istorics entara melhora dera qualitat de vida dera ciutadania d’Aran coma aguest acòrd tar Espitau o eth renauiment de convènis damb eth Departament de Salut en matèria de sanitat, era collaboracion damb eth Parc Salut Hospital del Mar o era cooperacion damb es centres espitalaris francesi, tanben damb era actualizacion e renauiment d’equipaments sanitaris que se trapauen en estat d’obsolescéncia tecnologica, es esfòrci entà ampliar era plantilha de professionaus sociaus e sanitaris, o era creacion deth nau blòc obstetric e es òbres que lèu començaram entara creacion deth nau blòc quirurgic, que mos permeteràn compdar damb tres quirofans de darrèra generacion”.

En aguest sens, Vergés a volut “remercar que, a despièch des discrepàncies aguest ei un govèrn dialogant e responsable que sap, e vò, arribar a acòrds coma eth qu’aué auem formalizat damb era Generalitat de Catalunya pr’amor qu’era nòsta prioritat ei qu’es persones que viuen e trabalhen en Aran agen asseguradi uns servicis publics de qualitat”. Atau donc era sindica d’Aran a arregraït” ath conselhèr Balcells era predisposicion deth sòn departament, pr’amor qu’aguest acòrd entara ampliacion e remodelacion deth nòste Espitau a estat frut d’ua negociacion entre andús govèrns a on a primat eth respècte e leiautat institucionau” e ath madeish temps tanben a dat es gràcies “ar ajuntament de Vielha e Mijaran e a toti es estaments e professionaus publics era sua collaboracion entà arribar ad aguest acòrd, qu’ei un acòrd de país”.

Vielha, 17 de març de 2023