• Era sindica d’Aran s’a amassat aguesta tarde damb es familhes que son en lista de demora dera Residéncia Sant Antòni e damb es potenciaus usatgèrs e usatgères detectadi peth Servici Aranés de Benèster e Salut, atau coma damb es vesins e vesies deth pòble de Les entà infomar-les sus toti es trabalhs realizadi entà adequar eth projècte iniciau dera Residéncia ara realitat des besonhs deth territòri e les a anonciat era prevision de dubertura d’aguest equipament

Era sindica d’Aran, Maria Vergés, s’a amassat aguesta tarde, per un costat, damb es familhes des persones en lista de demora dera Residéncia Sant Antòni e damb potenciaus usatgèrs e usatgères dera Residéncia e, per aute, damb es vesins e vesies de Les, entà tractar damb eri totes es nauetats entorn der estat dera Residéncia de Les e informar-les dera prevision qu’a eth govèrn d’Aran tà daurir es tres prumères plantes d’aguest equipament, damb capacitat entà 32 persones, a finaus d’enguan.

“Pendent era passada legislatura, de 2015 a 2019, eth Conselh Generau d’Aran inicièc eth projècte de bastiment dera Residéncia Sant Joan de Les entara gent grana, mès aguest projècte non compdaue damb cap estudi de viabilitat tecnica ne economica qu’auesse en compde es besonhs reaus deth territòri en aguest airau” a rebrembat era sindica d’Aran, en tot híger que: “eth còst dera òbra (2.415.000€) siguec finançat integrament peth Conselh Generau d’Aran, e non se compdèc damb partida pressupostària entà equipament e mobiliari”.

En aguest sens, higie tanben que: “aguest a estat e ei un ahèr primordiau e qu’a preocupat fòrça ath govèrn deth Conselh Generau d’Aran. A despièch dera manca de criteri tecnic damb eth que impulsèc er equipament e es retards qu’auem patit pr’amor dera situacion sanitària e sociau, auem artenhut a redefinir eth projècte e redigir un plan foncionau e de gestion, que non s’auien realizat, que permeteran qu’era Residéncia Sant Joan esdevengue un espaci que pogue acuélher as sòns usatgèrs e usatgères damb totes es garanties”.

Dempús d’estudiar possibles solucions entà adaptar aguest equipament as besonhs reaus deth territòri e d’auer encomanat eth pernitent Plan Foncionau e de Gestion entà definir es servicis e es espacis damb es qu’a de compdar ua residéncia d’aguest tipe, era prevision deth govèrn d’Aran ei que, tan lèu finalizen era actuau òbra, se liciten naues òbres entà adequar er espaci as besonhs mercadi per aguesti plans, en tot adaptar er equipament ara normativa en àmbit sociau actuauments vigenta.

“Aguesta primauera iniciaràm ues òbres entà realizar petites modificacions laguens dera bastissa, licitaram tanben era crompa de mobiliari, qu’ascendirà ath torn des 300.000 €, e s’amiarà a tèrme ua reurbanizacion der entorn dera Residéncia” a explicat era sindica, qu’a apuntat que se demore qu’es tramits des òbres siguen finalizadi aguesta tardor.

Ei previst qu’aguesta residéncia compde damb centre de dia damb capacitat maxima entà 25 persones, entà ampliar atau es servicis en matèria d’atencion sociau que balhe eth Conselh Generau d’Aran a trauès deth SABS. Era dubertura des tres prumères plantes dera Residéncia a finaus d’enguan supausarà ua prumèra fasa deth projècte. Se trabalhe damb er airau sociau entà definir er emplec des autes dues plantes, de manèra que tanben se pogue trabalhar damb d’auti besonhs qu’a eth territòri ara madeish coma era atencion ara discapacitat o era dependéncia.

Cau rebrembar tanben qu’era maxima institucion aranesa impulsèc, ara hè un an, eth Servici d’Atencion en entorn Domiciari (SAeD), que segontes era sindica: “auem entenut coma un recors essenciau entath territòri que respon ath modèl d’atencion as persones que volem potenciar, e qu’a d’auer en compde es preferéncies e besonhs des nòsti grani e s’ajustèsse ara sua realitat e ara deth nòste territòri”. Actuauments eth SAeD aten a 38 familhes, en tot auer atengut a un totau de 53 familhes ath long d’aguest prumèr an de foncionament.

Vielha, 28 de març de 2023