• Es tres organizacions trabalharam amassa entà desvolopar es aspèctes estrategics, foncionaus e tecnologics deth Programa d’Atencion Domiciliària Integrada d’Aran

Aguest projècte a per objectiu operativizar era gestion de donades e era informacion prevista en tot dar responsa a prètzhèts coma era configuracion e desplegament dera Unitat d’Analisi dera Coneishença entara estratificacion, era identificacion precòç de situacions de vulnerabilitat, eth monitorèg, eth seguiment des persones e es servicis, era avaloracion, era planificacion e era prenuda de decisions restacades ara salut e eth benèster dera poblacion dera Val d’Aran.

Era directora de l’IDEAI-UPC, Karina Gibert, destaque qu’era prepausa d’integracion tan pionèra des modèls sociaus e sanitaris proporcione ua vision olistica des persones que permet tier en compde non sonque es simptòmes des malauties, senon tot eth contèxt der individu entà hèr avaloracions mès suenhades e aumentar es succèssi des tractaments sanitaris e es intervencions sociosanitàries, e bastir ua relacion mès amabla entre eth sistèma de salut e sociau e es persones usatgères”. Atau madeish, remèrque qu’organizar jos es tecnologies mès modèrnes es donades permeterà poder apréner d’eres damb tecnica d’intelligéncia artificiau qu’a miei termini poguen ajudar a anticipar problèmes, tant entàs persones coma entara gestion deth pròpri sistèma de salut, tostemp damb ua perspectiva escrupolosament etica e damb toti es garanties de privadança e seguretat”.

Entà hèr front damb succès es rèptes qu’implique eth projècte, ath delà deth convèni signat, es Servicis Assistenciaus Integrats d’Aran an creat un hilat de collaboracion e trabalh conjunt entre empreses, academia, organismes assistenciaus e ciutadania. Aguesta estrategia en hilat a coma fin favorir eth desvolopament de projèctes conjunts, era recèrca e era formacion contunhada des professionaus. Com afirme eth director gerent, Jordi Vilana, “aguestes sinergies prebotgen naues idèes qu’impulsen eth sistèma ara innovacion e ara excelléncia, en tot que redusissen incertituds”.

Eth projècte ei estructurat en tres granes linhes de trabalh (modelizacion, gestion de donades e implementacion deth modèl integrat) e ei liderat dera Val d’Aran ençà. Era Fondacion TIC Salut e Sociau e er IDEAI-UPC i participen, autan coma, era Fondacion Union coma cap en encastre dera modelizacion. Segontes Vilana, “aguest ecosistèma d’aliances favorís era co-creacion de valor a trauès des hilats d’agents que trabalhen amassa en tot somar capacitats entà arténher es objectius estrategics deth nòste territòri; ei un entorn en quau toti i guanhen”.

Damb aguest projècte, era Val d’Aran hè un pas innovador tà ua atencion de salut e sociau mès integrada e eficienta. Jos eth lèma ‘Mos centram en tu, mos encuedam de tu’, eth territòri s’a dotat d’un modèl pionèr qu’a coma objectius milhorar era qualitat de vida dera poblacion, optimizar recorsi e compartir informacion entre es airaus: salut e sociau.

Eth Modèl d’Atencion Integrada d’Aran se base ena umanizacion dera assisténcia en tot méter as persones en centre des procèssi, en tot promòir era inclussion, era atencion de qualitat e era igualtat d’oportunitats. Aguesta perspectiva olistica milhore era eficiéncia des organizacions prestadores de servicis e facilite as professionaus obtier ua vision integrau des causes qu’influïssen ena salut e eth benèster dera ciutadania.

Un des objectius deth projècte ei promòir era participacion e proactivitat entre toti es nivèus assistenciaus e professionaus que lo conformen. En aguest sens, coma ditz eth director gerent des Servicis Assistenciaus, “cau conéisher es besonhs des familhes e dera comunitat e, damb era ajude dera tecnologia, auançar enquia modèls predictius e mès proactius”. Per aguest motiu, ua des prumères mesures en implementar ei era creacion d’espacis conjunts entre professionaus des dus encastres assistenciaus o era reconfiguracion des equipes en atencion primària formada per trabalhadors/es sociaus, educadors/es sociaus, infermièrs/es mètges/ses.

Era prestacion de servicis integradi d’Aran se caracterize per auer ua vision globau que cerque dar responsa as diferenti besonhs assistenciaus dera poblacion. Eth territòri a competéncies plees en matèria de salut e servicis sociaus dempús deth 2001 e 2004, respectivaments. Tal coma explique eth director gerent des Servicis Assistenciaus, aguesta governança e finançament unificat a trauès deth Conselh Generau d’Aran ei ua des claus entà garantir es recorsi de besonh entara sostenibilitat deth sistèma e trabalhar de manèra autonòma era atencion integrada.

Vielha, 4 agosto de 2023