• Ena Region Sanitària der Alt Pirineu e Aran, s’an installat en Bellver de Cerdanya, Pont de Suert, Esterri d’Àneu, la Pobla de Segur, la Seu d’Urgell, Oliana, Puigcerdà, Sort, Tremp e Vielha, vinils de 260 cm de diamètre entà hèr difosion dera campanha.

Jos eth lema “Non dèishes quèir en potz deth suicidi” qu’eth Departament de Salut metec en marcha eth passat mes de deseme, s’a iniciat aguesta accion comunicativa en carrèr damb era installacion temporau de vinils entà contribusir ara prevencion deth suicidi, sustot en òmes de mès de 50 ans. En Vielha, s’a collocat aguest vinil ena entrada deth Palai de Gèu pr’amor d’èster un lòc damb afluéncia de fòrça persones de edats diuèrses.

Es espisòdis de conducta suicida an incrementat en tot Catalonha enes darrèri ans, sustot dempús dera pandèmia, e eth Pirenèu non ei ua excepcion, tot e qu’era tendéncia ei menor qu’en d’auti endrets. Atau coma, segontes es donades provisionaus deth Còdi Risc Suicidi, en territòri er an 2023 s’an registrat 40 episòdis de conducta suicida (19 en hemnes e 21 en òmes), en tot qu’en 2022 siguèren 36 (23 de hemnes e 13 de òmes). Açò implique un aument der 11%. Er an 2019 se registrèren 24, igual qu’en 2020 entot qu’en 2021 sigueren 23.

Aguestes chifres includissen temptatives de suicidi e persones qu’an sigut atengudes en urgències damb idèes o pensament de suïcidi (ideacion deth suicidi). En aguest darrèr apartat, ei notòri er increment enes òmes qu’an passat de 4 en 2022 a 12 en 2023, en tot qu’es hemnes disminuissen, de 12 a 8 casi.

Eth gerent dera Region Sanitària Alt Pirineu e Aran, Miquel Abrantes, explique qu’ “es zònes mès ruraus non son exemptes de temptatives de suicidi, mès ath contrari. A viatges, enes comunitats mès petites, a on toti se coneishen, se pòden agravar era pòur a èster estigmatitzat. Per aguest motiu ei de besonh balhar airines as persones que se tròben en aguesta situacion e, fòrça mès, ath sòn entorn, que s’identifique signes d’alarma e pòt demanar ajuda especializada en tot trucar ara 061 Salut Arrespon”. Abrantes s’a mostrat convençut que “campanhes coma aguesta ajuden a préner consciéncia as afectadi que i a manères de cercar gessudes ath sòn malestar”.

Damb aguesta accion comunicativa se vò hèr préner consciéncia as familhaus e a l’entorn, mès que mès d’òmes de mès de 50 ans, entà que non banalizen es situacions de risc e acompanhen ara persona susceptibla de desvolopar ua conducta suicidària. Pr’amor que detectar idèes suicidàries abans que se produsisque un assag ei essenciau entà poder previer pèrtes evitables.

Vielha, 19 de hereuèr de 2024