- Aguesta remodelacion permet compdar en nòste espitau damb dus quiròfans en plen rendiment que se junhen ath nau blòc obstetric, dotadi damb es darrères tecnologies
- Aguesti trabalhs an estat possibles gràcies ara dedicacion des professionaus, tant d’Aran Salut coma deth Conselh Generau d’Aran, que an amiat a tèrme un gran esfòrç entà complir es terminis previsti
Ja son acabades es òbres deth nau airau quirurgic der Espitau Val d’Aran iniciades eth passat 2 de mai peth Conselh Generau d’Aran. A compdar d’aguest moment, er Espitau compdarà damb dus quiròfans de plen rendiment e damb un blòc obstètric, toti damb tecnologia de darrèra generacion.
Aguesti naui equipaments permeten ua organizacion mès eficienta dera activitat quirurgica, pr’amor qu’a compdar d’ara, es intervencions d’urgéncies non afectaràn ara activitat quirurgica programada. Aguest ei un auanç fòrça important entath nòste sistèma sanitari, que mos permet aufrir era milhor atencion possibla as pacients en tot milhorar era accessibilitat des usatgèrs as servicis quirurgics programadi e urgents.
Per çò que tanh ath blòc obstetric, d’ara en deuant, Aran compdarà damb un espaci exclusiu entara atencion ara hemna en procés de part e deth sòn repopet. Es naui espacis cònsten d’ua sala de dilatacion contigua ara sala de parts que s’a dotat damb tot er equipament de besonh entà garantir era major seguretat ena assisténcia e un major confort entara mair e eth/era recent neishut/da.
Per tant, damb aguesta remodelacion s’a aumentat era qualitat, era accessibilitat e era seguretat clinica laguens er airau quirurgic, en tot méter a disposicion des professionaus uns espacis de darrèra generacion. A mès a mès, aguest cambi permet era ampliacion dera realizacion de pròves diagnostiques.
Cau destacar qu’aguesti trabalhs an estat possibles gràcies ara implicacion des professionaus tant d’Aran Salut coma deth Conselh Generau d’Aran. Arregraïm era plea dedicacion qu’an auut es equipes quirurgics d’Aran Salut qu’an amiat a tèrme un gran esfòrç entà poder trabalhar sense ajornaments e en tot mantier en gran mesura era activitat programada, e qu’an desvolopat un plan de contingéncia entà trabalhar damb seguretat e coordinacion damb era rèsta d’espitaus mentre durauen es òbres.
Vielha, 2 d’agost de 2023
